هو كل واحد فينا بيفسر الدين والسياسة علي كيفه لي ؟؟

لما نطلع فمظاهرة ونغير نظام البلد نبقي أبطال ولو نفس المظاهرة فشلت نبقي مثيرين شغب ويعدمونا لي ؟؟

هو لما أطالب بحقي أبقي مش محترم وأما أبقي جاسوس أبقي طالب مجتهد لي ؟؟

ولما كل واحد فينا بيقول محدش يزعل من التان أمال كل الزعل دا جاي منين ؟؟

ولما إحنا كلنا مية مية وأصحاب قضية كل الجواسيس دي جت منين ؟؟

وأما كل واحد بيقول أبناء دفعتي العزيزة أمال كل الناس كارهة الدفعة وعاوزة تمشي لي ؟؟

هو كل ما اتكلم كلمة يطلع واحد يقولي ( البنات ) لي ؟؟

وأما أنا بقول دا كله مش يمكن أطلع أنا كمان جاسوس !! طيب مش ممكن لي ؟؟

شهداء 25 يناير ماتوا فأحداث يناير !! هو أنا كل ما بسمع الأغنية دي أعصابي بتفلت مني لي ؟؟

هو كل واحد شايف نفسه تمام وكل الناس تيييييت لي ؟؟

هو الطالب المصري – والسوهاجي تحديدا – مطلوب منه يبقي سوبر مان لي ؟؟

ولما اساتذتنا عاوزينا نبقي زي الجامعات العالمية مش بيصلحوا من نفسهم لي ؟؟

هو دايما العيب فالطالب مفيش أستاذ بيبص علي نفسهه ويقول أنا مبعرفش أشرح لي ؟؟

ولما هو المنصب مش فارق معاك ونفسك تستريح منه طاب ماسك فيه لي ؟؟

هو كل ما أكلم حد يقولي curriculum لي !! هو البتاع دا مش عملي ونظري برضه واللا اي ؟؟ نقعد نحفظ نحفظ وخلاص من غير ما نشوف حاجة طاب بنحفظ دا كله لي ؟؟

كل واحد يقولي بكرا تروق وتحلو هو بكرا دا مش راضي ييجي لي ؟؟

هو أنا بكتب دا كله أساسا لي ؟؟! هو يعني أنا ملاك واللا إي ؟؟!

هو أصحابي دول بيحبوني بجد واللا إي ؟؟ أنا مش شايف حاجة تتحب طاب بيحبوني علي إي ؟؟

هو كتاب البيو دا عامل كدا لي ؟؟ هوو الكتاب دا اينشتاين كان بيذاكر منه واللا إي ؟؟

هو الإمتحان لما كله بيجي مالمحاضرة مديينا الكتاب دا لي ؟؟ ولما أنا هدفي أتعلم بيحاسبوني علي حضور المحاضرة لي !!؟؟ هو يعني لما أحضر المحاضرة هسمع يعني مانت سيد العارفين كل الناس بتحكي لي ؟؟

هو انا اتغديت 3 مرات ولسا جعان لي ؟؟

هو لما اذاكر 2 تيكست بوك وكتاب ومحاضرة ونت كمان باقي المواد هعمل فيها إي ؟؟ هو أنا مليش أهل أشوفهم واللا إي ؟؟ هو الأوائل بيطلعوا دايما يبكوا من الإمتحان لي ؟؟

طاب أنا لو بكيت هطلع مالأوائل واللا إي ؟؟

ولما كل واحد يقولنا هدفه يخدم الدفعة بطريقته طاب الجاسوس دا كمان هدفه مصلحتنا واللا إي ؟؟

هو أنا إتجننت واللا إي ؟؟ هروح أنام بقي بس ياريت حد يجاوبني علي دا كله

وقبل ما يجاوب يقولي هو أصلا بيجاوبني لي ؟؟