بعد الأعوام الثلاثين التي قضيناها في ظل مبارك. كم يصل غيظك عندما تسمع عبارة من قبيل ( هو مين غيره هيحكمها !!! ) و ( محدش ينفع غيره ) طيب باقي الدول اللي معندهاش مبارك حالها إي ؟؟

هو مين غيره هيحكمها

......

لما البلد تتباع حته حتة .أحمد عز يشتري شركة الإسكندرية للحديد والصلب وتبقي " حديد عز " ويوصل طن الحديد ل12 ألف جنيه. عمر أفندي تتباع بأقل من تمنها 100 مرة . أرض مدينتي ياخدها طلعت مصطفي ببلاش. مصانع الغزل اللي كنا واخدين بيها مركز عالعالم تتقفل. ثروة البلد تبقي فإيد عز وطلعت مصطفي والمرشدي. يبقي محدش ينفع غيره

هو مين غيره هيحكمها ......

لما طلعت حرب بني بلدنا حتة حتة ومبارك باعها كلها. لما بنوك مصر كلها اتخصخصت. شركة الميه حتي خصخصوها والكهرباء اتباعت من غير تمن. لما الغاز يتصدر ببلاش لإسرائيل ويتباع للمصري بالسعر العالمي وياريت لاقيينه. يبقي محدش ينفع غيره

هو مين غيره هيحكمها ......

لما الحزب الوطني يزور 95% من مقاعد البرلمان شعب وشوري. ولما الجنزوري يعترض ان دخل قناة السويس بياخده الحرس الجمهوري كاملاً فيتشال من رئاسة الوزراء. لما يبقي قانون الطوارئ متطبق 30 سنة لحد ما الظابط بقي رسول من السما متقدرش تكلمه. لما الوزير يبقي عضو برلمان وعضو حزب وليه 30 وظيفة حكومية فنفس الوقت. يبقي محدش ينفع غيره

هو مين غيره هيحكمها .......

لما مشروع توشكي فجأة يتباع للمستثمرين ويزرعوه فواكه ويصدروها. والشعب مش لاقي ياكل. لما تستورد 40% من قمح البلد من قمح لا يصلح للمواشي. لما كيلو اللحمة يوصل 100 جنيه فوسط القاهرة وياريت سليم دا كله أمراض ومسمم. لما توقف فطابور العيش وتاخد مطوه فالآخر وتروح من غيره كمان. لما تولع فنفسك فميدان عام ومحدش يسأل فيك. يبقي محدش ينفع غيره

هو مين غيره هيحكمها ........

لما شيخ الأزهر يبقي عضو فالحزب الوطني وتتحكم الحكومة فالدين. لما المتظاهرين يقولوا رأيهم يتضربوا بالنار فميدان عام. الشرطة تخرج بلبس مدني بالسلاح الأبيض وتقتل المتظاهرين. ويتمسكوا ويتسلموا للجيش وأرقام بطاقاتهم عند الجيش وجمعيات حقوق الانسان تقدم بيها بلاغ للنائب العام. ويطلع تلفزيون مبارك ينفي ويكذب. لما الجزيرة تقول رأيها وتنقل بالفيديو لحظة بلحظة رأي الناس.....فتتقفل. لما نفصل الانترنت والرسايل عشان نقطع اي تواصل. يبقي محدش ينفع غيره

هو مين غيره هيحكمها .......

ماحنا اتولدنا ملقيناش غير مبارك قدامنا. البلد كبيرة قوي عليه. أمال الصين مليار و800 مليون رئيسها بيحكمها أزاي؟؟؟؟؟ لما هو عمل حاجات كتير سرق قد اي قصادها وشلة الفساد بتاعته سرقت كام؟؟

لما هو طرطور والناس بتعمل كدا من وراه متمسك بيها لي طيب؟؟؟ لما تركيا تدافع عن مواطنيها وتهدد إسرائيل واحنا ملناش اي لازمة فالعالم يبقي محدش ينفع غيره.

هو انتوا شفتوا اساسا غيره؟؟؟ غيره هيخرب برضه طاب غيره هيبقي عنده مجلس شعب وشوري حقيقي يحاسبه. مش هيبقي المجلسين والحكومة والحزب شيء واحد. احنا كنا فأمن وأمان قبل كدا !! طاب ما كان أي ظابط بيسحبك عالقسم وتاخد علي قفاك لما يبانلك صاحب لو ملكش حد يخرجك بواسطة.

لما الحزب الوطني يتحكم فكل حاجة فبلدك دا قرب يبعنا احنا شخصيا للأجانب .............

لسا بتقول محدش ينفع غيره ؟؟؟؟؟؟؟؟؟؟؟؟؟؟؟؟